English Version (Click Here)

Gusto mo ng isang kasabihan tungkol sa pera kung saan mapapaisip ka? Basahin mo ito:

“Don’t tell me what you value, show me your budget, and I’ll tell you what you value.”

— Joe Biden

(Tagalog) Huwag mong sabihin sa akin kung ano ang pinahahalagahan mo sa buhay. Ipakita mo sa akin ang iyong budget (iyong mga pinagkakagastusan) at sasabihin ko sa iyo ang mga pinahahalagahan mo sa buhay.

Kung ako tatanungin mo, sang ayon ako doon. Ang mga pinagkakakagastusan natin ay nananalamin sa mga pinapahalagahan natin sa buhay. Halimbawa, ang iba gumagastos sa paglalakbay o pagtravel sa mundo para palawakin ang kanilang isipan. Ang iba gumagastos sa mga mamahalin at branded na gamit para magyabang. Ang iba gumagastos para pagandahin ang buhay ng kanilang mga anak. Ang iba naman gumagastos sa alak at ilegal na droga. Ang pinagkakagastsuan ng mga tao ay nananalamin sa mga pinahahalagahan nila sa buhay.

Alamin mo ang mga pinagkakagastusan mo. Ano ang mga pinahahalagahan mo?

“Bumoboto” tayo gamit ang ating mga pitaka/pera

Tulad ng kung paano tayo bumoboto sa mga pulitikong sinusuportahan natin (dahil sinusuportahan nila ang mga isyung mahalaga sa atin), ganoon din ang ginagawa natin gamit ang ating pera. “Binoboto” natin at ibinibigay natin ang ating pera sa mga produkto o kumpanyang sinusuportahan natin, at iniiwasan nating bilihin ang mga kinaaayawan natin.

Habang karamihan sa atin ay bumibili ayon sa mga kagustuhan natin, minsan din bumibili tayo ayon sa mga pinahahalagahan natin. Isipin mo ang mga sumusuporta sa mga “green” at “eco-friendly” na produkto. Mga taong iniiwasan ang mga produktong nagsasagawa ng animal testing at pangaabuso. Mga taong sumusuporta sa mga local businesses (tulad ko) at mga maliliit na entrepreneurs.

Pwede tayong gumastos ayong sa mga pinahahalagahan natin sa buhay (values).

Ako ay mayroong mga values o pinahahalagahan sa buhay na ginagamit ko bilang basehan ng aking mga desisyon ayon sa aking mga binibili. Sumusuporta ako sa mga lokal na produkto at negosyo, tutol ako sa paninira sa West Philippine Sea at mga coral reefs dito, tutol ako sa mga “debt trap” policies ng isang gubyerno, tutol ako sa intellectual property theft (pagnanakaw ng mga kaalaman o idea at pamemeke), historical censorship (pagbabago o pagtatago ng mahahalagang kasaysayan), at iba pa. Dahil doon mayroon akong estilo ng pamimili na sumusuporta sa mga values ko.

Marami ang gustong sumubok sa shopping style kong ito (bago may pagbabago sa mundo ng pulitika), pero nahihirapan ang iba. Akala ng iba lahat ng bagay ay ginagawa sa bansang iyon kaya “imposible” daw, pero mali iyon. Napakaraming brands at kagamitang ginagawa sa Pilipinas, at marami ring brands at gamit na hindi ginagawa sa bansang iyon.

Kailangan mo lang maging mas-masusi sa pagtingin sa mga bilihin. Ipagpatuloy mo lang ang pagbabasa nito para matutunan mo pa!